Santa Minia a multiplicadora



LA VOZ DE GALICIA | 28/09/2015

Como ocorreu co Sol, a Terra e a Lúa, onte houbo unha confluencia de circunstancias que converteron en histórica a xornada vivida en Brión. A coincidencia dominical do calendario, o bo tempo e a celebración de Santa Minia levaron a máis de 50.000 persoas ao tranquilo municipio metropolitano, no que viven uns 7.500 veciños. Hai algúns síntomas para pensar que se trata dunha das afluencias máis multitudinarias que se lembran. O coordinador da festa, Alberto Álvarez, confirmou que «nunca estivera a carballeira tan chea de xente. Hoxe (por onte) era o agardado, pero é que na queima da fachada do sábado non había un sitio libre». Moitos tiveron que conformarse con ver de lonxe a tirada de fogos, que correu a cargo de Pirotecnia López.

Dende primeira hora da mañá miles de devotos chegados no medio centenar de autobuses desde toda Galicia acudiron a cumprir coa tradicional visita á santa, bicando o sepulcro no que repousan os seus restos e pasando sobre el as típicas estampitas de santa Minia para ter sorte todo o ano.

De novo nesta ocasión impediuse que as velas quedasen acesas na capela, aínda que os romeiros si puideron depositalas na casa reitoral, onde teñen lugar as misas. Mans, brazos, pernas... todas de cera, compradas nos postos instalados ao efecto, e todas de acordo con aquelas partes do corpo para as que se pide a axuda da santa.

Ata 5.000 quilos de polbo

Máis sinais inequívocos de que a vivida onte foi unha das xornadas con máis afluencia foi o consumo de polbo. En tres días, os postos serviron entre 4.500 e 5.000 quilos, a 8 euros a ración. Tamén houbo 175 postos de vendas variadas, que estiveron moi frecuentados durante todas as xornadas.

E logo está o tráfico. A celebración chegou a provocar algunhas retencións na autovía de Brión, e nas horas punta, especialmente en torno ao mediodía, houbo esperas de até 45 minutos. Poucos, só os máis temperáns, lograron deixar o seu coche sen unha demora dun vinte minutos. En calquera caso, desde o Concello felicitáronse polo funcionamento do dispositivo de seguridade, con só un par de traslados ao hospital de persoas maiores por precaución.

AFLUENCIA

50.000 persoas
Esperas de 45 minutos Os atascos para lograr un lugar no que aparcar chegaron até a autovía.

A romaría de Santa Minia fulminou todos os récords cuns 50.000 devotos en Brión



EL CORREO GALLEGO | 28/09/2015

A brionesa romaría de Santa Minia bateu, a xuizo da organización, todos os récords, coa previsión de que onte, no tercer e último día dos fastos, achegaranse máis de 50.000 fieis a Brión, superando as cifras do 2009 pola coincidencia do día grande en domingo e o bó tempo, que contribuíron ao éxito. Así, e segundo o coordinador da festa, Alberto Álvarez, “nunca estivera a carballeira tan chea de xente”. Mesmo afirman que houbo retencións na autovía, e as colas para bicar a imaxe prolongáronse durante 45 minutos onte, día no que, desde as 09.00 horas, milleiros de devotos chegados en máis de medio cento de autobuses de toda Galicia acudiron a cumprir coa tradicional visita á santa.

Do mesmo xeito, a avenida principal estivo ata os topes en canto a postos de venda de rosquillas, roupa, chourizos, larpeiradas, licores, filloas... máis de 175 en total. Outras que estiveron ateigadas foron as cinco polbeiras emprazadas na zona, que non deixaron de vender racións de cefalópodo, churrasco, carne ao caldeiro e, incluso, paella, contando con despachar ata cinco toneladas polbo. O único inconvinte foi a calor, que obrigou a trasladar a varios maiores, pero só por seguridade.